Rhaglen Gwenynfeydd Sentinel Gwirfoddol

Sefydlwyd y rhaglen gwenynfeydd sentinel gwirfoddol yn 2010 er mwyn cynyddu'r gwaith o oruchwylio plâu egsotig yng Nghymru a Lloegr. Mae gan bob rhanbarth yng Nghymru a Lloegr o leiaf 15 gwenynfa sentinel wirfoddol, sydd wedi cael eu dewis oherwydd eu bod yn agos at bwyntiau risg egsotig. 

Mae'r cynllun yn gofyn i wenynwyr sy'n cymryd rhan yn wirfoddol fonitro eu nythfeydd am blâu egsotig a chyflwyno dwy sampl o grafiadau llawr/gweddillion cwch gwenyn yn ystod y tymor gweithredol gan ddefnyddio cyfarpar a deunyddiau a ddarperir gan yr Uned Wenyn Genedlaethol. Caiff yr holl gyfarpar ei gyflenwi am ddim i'r gwenynwyr sy'n cymryd rhan, a chaiff y costau postio eu talu ar eu rhan hefyd.

Prif nod y rhaglen yw canfod plâu egsotig statudol, sef chwilen fach y cwch (Aethina tumida) a gwiddon Tropilaelaps spp. Mae rhai gwenynfeydd sentinel gwirfoddol hefyd yn monitro am gacwn Asia mewn ardaloedd risg uchel. I wneud gwaith monitro cyffredinol am gacwn Asia, nid ydym yn argymell y defnydd o drapiau sy'n lladd gan eu bod yn peri risg i infertebratau brodorol. Os gall gwenynwyr gwenynfeydd sentinel gwirfoddol ymrwymo i archwilio eu trapiau bob dydd er mwyn rhyddhau creaduriaid a ddalwyd yn anfwriadol, cânt eu hannog i fonitro am gacwn Asia fel rhan o'r rhaglen.

Rhaglen Gwenynfeydd Sentinel Uwch

Yn ogystal â'r rhaglen Gwenynfeydd Sentinel Gwirfoddol, mae rhaglen Gwenynfeydd Sentinel Uwch wedi cael ei datblygu. Mae'r rhaglen Gwenynfeydd Sentinel Gwirfoddol yn dibynnu ar wenynwyr sy'n cymryd rhan yn wirfoddol ond o dan y rhaglen Gwenynfeydd Sentinel Uwch caiff archwiliadau arbenigol o nythfeydd eu cynnal gan Arolygwyr Gwenyn Cymeradwy dair gwaith y tymor.

Sut i gymryd rhan

Os yw eich gwenynfeydd yng Nghymru neu Loegr a'ch bod yn awyddus i gymryd rhan yn y rhaglen Gwenynfeydd Sentinel Gwirfoddol neu'r rhaglen Gwenynfeydd Sentinel Uwch, cysylltwch â'ch arolygydd gwenyn lleol i drafod y mater. Ceir rhagor o fanylion ar ein tudalen Cysylltu â Ni. 

Dogfennau i Gyfranogwyr (Saesneg yn unig)

Offer ar gyfer y Rhaglen Gwenynfeydd Sentinel Gwirfoddol

Defnydd o drap llawr Chwilen Fach y Cwch

Labeli Samplau 

Rhagor o wybodaeth

I gael rhagor o wybodaeth am y posibilrwydd o risgiau plâu egsotig i'r DU, darllenwch fwy ar ein tudalen Plâu egsotig, neu lawrlwythwch ein taflenni cynghorol ar chwilen fach y cwch a gwiddon Tropilaelaps.