Ar 8 Mehefin 2026, cadarnhawyd bod Aethina tumida (chwilod bach y cwch) yn bresennol mewn gwenynfa yn nhalaith Latina yn rhanbarth Lazio yng nghanolbarth yr Eidal. Mae hwn yn achos newydd o chwilod bach y cwch a ganfuwyd y tu allan i'r ardaloedd yn ne'r Eidal yr effeithiwyd arnynt yn flaenorol.
Dengys data gwyliadwriaeth un wenynfa bositif yn Latina a gwenynfa sentinel bositif a gofnodwyd yn Sisili. Mae gwaith monitro yn parhau mewn rhanbarthau yr effeithir arnynt.
Mae'r lleoliad newydd fwy na 400 km o'r ardal yn Calabria lle yr ymsefydlodd y pla gyntaf, a ddangosir yn y map hwn gan awdurdodau'r Eidal. Dengys hyn naid ddaearyddol sylweddol ac mae'n awgrymu symudiad dros bellter mawr yn hytrach na lledaeniad naturiol.
Mae awdurdodau yn yr Eidal wedi rhoi mesurau rheoli ar waith yn unol â gofynion yr UE, gan gynnwys gwyliadwriaeth fanylach yn yr ardal gyfagos a chyfyngiadau ar symud gwenyn a chyfarpar gwenyna.
Mae'r DU wedi atal gwenyn, cynhyrchion gwenynyddiaeth a chyfarpar gwenyna ail law rhag cael eu mewnforio i Brydain Fawr (Cymru, Lloegr a'r Alban) o ranbarthau Lazio, yn ogystal â'r mesurau hynny sydd eisoes ar waith ar gyfer Sisili a Calabria. Bydd y mesurau arbennig hyn yn gymwys i Lazio yn yr Eidal o 13 Mehefin 2026 a byddant yn parhau i fod yn gymwys nes iddynt gael eu dirymu neu eu diwygio: am ragor o fanylion, gweler canllawiau GOV.UK.
Atgoffir gwenynwyr o bwysigrwydd dilyn arferion bioddiogelwch da a chadw llygad am arwyddion o chwilod bach y cwch gwenyn, yn enwedig wrth gaffael gwenyn neu gyfarpar. Mae rhagor o wybodaeth am chwilod bach y cwch ar gael ar BeeBase.