Mae'r gwiddonyn Tropilaelaps yn peri risg bioddiogelwch sylweddol i boblogaeth gwenyn Prydain Fawr. Yn ystod y blynyddoedd diwethaf, mae poblogaeth Tropilaelaps mercedesae wedi lledaenu tua'r gorllewin o'i chynefin brodorol yn Asia. Mae poblogaethau bellach wedi cael eu cadarnhau yng ngorllewin Rwsia a Georgia. Mae gwyliadwriaeth ar gyfer y gwiddonyn Tropilaelaps yn Wcráin yn gyfyngedig ar hyn o bryd. Gan ystyried lledaeniad parhaus y pla tua'r gorllewin ar draws cyfandir Ewrop a'r heriau sy'n gysylltiedig â'i synhwyro, ceir pryderon efallai nad yw'r ymdrechion gwyliadwriaeth presennol yn ddigonol i nodi ei bresenoldeb mewn ffordd ddibynadwy.
Rydym yn cyflwyno mesurau diogelu dros dro i atal allforion gwenyn mêl, cynnyrch gwenynyddiaeth penodol a chyfarpar gwenyna wedi'u defnyddio o Wcráin er mwyn diogelu bioddiogelwch Prydain Fawr.
O 7 Hydref 2025 ymlaen, gwaherddir allforio'r cynnyrch gwenyn a gwenynyddiaeth canlynol i Brydain Fawr o Wcráin:
- gwenyn mêl
- sgil-gynhyrchion gwenynyddiaeth heb eu prosesu
- cyfarpar gwenyna wedi'u defnyddio
- cynnyrch gwenynyddiaeth mewn crwybrau y bwriedir iddynt gael eu bwyta gan bobl
Camau gweithredu i wenynwyr
Rydym yn gofyn i wenynwyr barhau i fod yn effro i'r risg y gallai Tropilaelaps ymledu. I ddysgu mwy am sut i adnabod Tropilaelaps, darllenwch y dudalen hon.
Dangoswyd bod gwiddonyn Tropilaelaps yn bla hynod symudol y gellir ei gyflwyno'n hawdd i ranbarthau newydd drwy fasnach fyd-eang mewn cwyr gwenyn neu drwy fewnforio gwenyn pecyn neu freninesau. Mae'n hanfodol bod mewnforwyr gwenyn a chynhyrchion gwenyn yn ymwybodol o'r ddeddfwriaeth ynglŷn â mewnforio gwenyn a chynhyrchion gwenyn a'u bod yn cydymffurfio â'r ddeddfwriaeth honno.
- Mae Tropilaelaps yn bla hysbysadwy statudol; rhaid hysbysu'r Uned Wenyn Genedlaethol ar unwaith pan fydd tystiolaeth o bresenoldeb Tropilaelaps mewn cwch gwenyn.
- Ni chaniateir mewnforio unrhyw wenyn, cynhyrchion gwenynyddiaeth heb eu prosesu na chyfarpar gwenyna wedi'u defnyddio o: Wcráin.
- Dim ond breninesau (gyda gwenyn gweithgar sy'n gweini arnynt) y gellir eu mewnforio o wledydd eraill
- Rhaid rhoi gwybod am unrhyw fewnforion (gwenyn a chynhyrchion gwenyn) drwy'r Gwasanaeth Mewnforio Cynhyrchion, Anifeiliaid, Bwyd a Bwyd Anifeiliaid (IPAFFS)